«Qalalyq AMSK ortalyǵy» JShS dırektory Tatıana Bashırova búgingi kúnde jaýapty naýqanǵa daıyndyqtyń qyzý júrip jatqanyn aıtady.
– Vaksınalaý ortalyǵy bizdiń fılıalymyz. Munda jalpy tájirıbe dárigerleri qabyldaǵan otbasylyq densaýlyq ortalyǵy jáne kúndizgi stasıonar fılıaly ornalasqan. Biz óz bazamyzda vaksınalaý júrgizýge qajetti nárseniń barlyǵyn tez arada daıyndaı aldyq. Kabınetterdi kóshirý, jabdyqtardy ornalastyrý qajet boldy. Medısınalyq muzdatqysh kameralar, termokonteınerler alyndy. Mamandarymyz, atap aıtqanda, dárigerler medısınalyq ýnıversıtet bazasynda, medbıkeler kolledjde arnaıy oqýdan ótti, – deıdi ol.
Vaksınalaý ortalyǵynda terapevt-dárigerdiń kabıneti, egý bólmeleri, ekpeden keıingi baqylaý aımaǵy bar. Shuǵyl jáne shtattan tys jaǵdaılar úshin jedel medısınalyq kómek aımaǵy jabdyqtalǵan. Sonymen qatar kabınetterde vaksınasııalaýdyń barlyq úderisin tirkeıtin beınebaqylaý kameralary ornatylǵan jáne ol beınederekter jyl sońyna deıin saqtalatyn bolady.
Qaraǵandy oblystyq densaýlyq saqtaý basqarmasynyń qoǵamdyq densaýlyq saqtaý qyzmetiniń basshysy Bıbigúl Tólegenova dál osyndaı vaksınalaý ortalyqtary óńirdiń basqa da qalalarynda jumys isteıtinin habardar etti.
– Biz vaksınalaýǵa daıyndyqty jeltoqsan aıynda bastadyq. Qajetti medısınalyq muzdatqyshtar men termokonteınerlerge tapsyrys berdik. Jabdyqtyń bir bóligi jetkizildi, qalǵany jolda. Oblys boıynsha alǵashqy medısınalyq-sanıtarlyq kómek uıymdarynda 115 ekpe kabıneti ashylady. Biz tolyq qyzmet kórsetetin jeke ortalyqtar uıymdastyrýdy uıǵardyq. Birinshisi Qaraǵandyda AMSK QO bazasynda quryldy. Odan ári Temirtaý, Jezqazǵan jáne Balqash qalalarynda ashamyz. Qazir vaksınanyń jetýin kútip otyrmyz jáne bul mańyzdy is-sharany 1 aqpanda bastamaqpyz, – dep málimdedi B.Tólegenova.
Jalpy mamannyń aıtýy boıynsha, vaksınalaý aldynda pasıentti mindetti túrde dáriger tekserip, ystyǵyn ólshep, qajetti aqparatty jınaıdy. Egý pasıent vaksınasııaǵa jazbasha kelisimin bergennen keıin ǵana júzege asyrylady. Al jospar boıynsha bir egý kabınetiniń ótkizý qabileti ortasha eseppen alǵanda kúnine 60 adamdy quraýy tıis degen boljam bar.
«Spýtnık V» vaksınasyn jetkizý logıstıkasymen biryńǵaı dıstrıbıýtor «SK-Farmasııa» aınalysady. Al ekpe preparatynyń ózi tehnologııalar transferti boıynsha Qaraǵandy farmasevtıkalyq kesheninde óndiriledi. Atalǵan vaksına «SK-Farmasııa» qoımalaryna kelip túskennen keıin oblystyq ekpe qoımasyna jetkiziledi de, aımaqtarǵa taratylady.
Negizinde «Spýtnık V» vaksınasynyń logıstıkadaǵy ózindik erekshelikteri bar ekenin aıta ketý kerek. Máselen ony tasymaldaý kezinde -20° C temperatýralyq rejimdi saqtaý qajet. Sondyqtan tasymaldaý belgilengen temperatýrany 48 saǵat boıy ustap turatyn syıymdylyǵy 80 lıtr bolatyn arnaıy termokonteınerlerde júzege asyrylady. Temperatýralyq rejimdi jazýdy loggerler júrgizedi. Keıinnen elektrondy derekter tirkeýshisin kompıýterge qosyp, temperatýranyń aýytqýyn baqylaýǵa bolady. Al búgingi kúnde oblystyq densaýlyq saqtaý basqarmasy vaksınany saqtaýǵa arnalǵan arnaıy medısınalyq muzdatqyshtardy satyp alǵan eken.
Qaraǵandy oblysynda vaksınalaý mynadaı jospar boıynsha iske asady: birinshi kezeńde óńirdiń ınfeksııalyq aýrýhanalardyń, jedel medısınalyq kómektiń, reanımasııa bólimsheleriniń, AMSK uıymdarynyń, qabyldaý bólmeleriniń jáne sanepıdqyzmettiń toǵyz myńǵa jýyq medqyzmetkeri egiledi. Odan keıin pedagogtar, kúshtik qurylymdar qyzmetkerlerin jáne sozylmaly aýrýlarmen dıspanserlik esepte turǵan adamdar vaksınalaýdan ótedi.
Jaýapty mamandar reseılik «Spýtnık V» vaksınasy qaýipsiz degendi aıtady. Bul ózi eki quramdas bólikten turatyn preparat eken. Birinshi jáne ekinshi egilýdiń arasyndaǵy merzim 21 kún bolýy tıis. Bir eskerte ketetin jaıt, vaksınalaýǵa 18 ben 60 jas aralyǵyndaǵy eresekter ǵana jatady. Al basqa jas sanattary úshin synaqtar áli júrgizilmegen. Eger de dertiniń jiti kezeńinde bolmasa, sozylmaly aýrýlary bar adamdardy da egýge bolady eken. Taǵy bir aıta ketetin nárse, eger adam alty aı buryn KVI-men aýyryp turǵan bolsa, bul jaǵdaı vaksınalaýdyń qajeti joq degen sóz emes. Sebebi adam ımmýnıtetiniń qandaı merzimge qalyptasatyny áli belgisiz bolyp otyr.
Maman-dárigerler vaksınalaýdan bir táýlik buryn jáne odan keıin de bir kún boıy sporttyń aýyr túrlerimen shuǵyldanýǵa, saýnaǵa barýǵa jáne spırttik ishimdikter ishýge bolmaıtynyn eskertedi.
